馬爾代夫超強海洋生態平價渡假村 @ Eriyadu Island Resort Maldives - 卡夫環礁 - 出發吧｜旅魔頭的網誌

今次馬爾代夫雙島遊，最後兩晚就係入住 Smartline Eriyadu Resort～價錢超震撼！$1052 HKD 一晚兩位海景房包早晚自助餐（含稅）！簡直布吉都冇咁平😝我覺得起碼要住三晚💯 我選擇最 cheap 嘅房型 standard room，佢另有 deluxe room 係單幢屋仔，會貴啲。個人覺得冇必要，standard room 雖然外觀睇係兩層 building ，但係每一間都望海！樓下行出去就係沙灘🏖️樓上就無敵海景！

以下簡單講下佢有咩優點:

超平，$1052 HKD 雙人房仲要包早晚兩餐自助餐，日本都做唔到了吧～（我check agoda旺季11月開始會貴多幾百蚊）
潛水A級島，超強海洋生態，講緊碼頭落船已經見到幾條護士鯊喺船底游，碼頭位置已經充滿珊瑚，唔使落水已經睇到超多唔同品種嘅彩色魚
成個島都可以浮潛，冇任何一部份唔可以游（Thulhagiri 島有一半不可游，又浪大），Eriyadu 超多魚睇，有兩款鯊魚，海龜，stingray 等等大魚，同埋各種彩色珊瑚魚，超級精彩！外面一整圈都係珊瑚礁，環島游一圈要兩日，我每日都游起碼兩個鐘，游足三日先兜咗一個圈（我已經算係游得好快）
水面風平浪靜無浪，好容易游，新手浮潛非常適合，沙灘已經超多魚，游幾步就到珊瑚礁斷崖(最多魚睇嘅位置)，比 Thulhagiri 強超多
每日下午15:30-16:00，碼頭會幾條護士鯊集結，大家可以碼頭落水同佢地一齊游水，又或者岸上面睇！淨係呢個活動已經值回票價（免費的）
自助餐食物款式雖然唔多，但係味道好
服務態度優秀
冇咁近機場，少啲污染
每晚有免費活動，我哋其中一晚玩左 DJ night，幾過癮
基本上冇其他活動需要參加，因為淨係游水同埋浮潛已經好忙😂不過我都參加左一日釣夜魚🎣$55.5 USD ^{(HKD 432)}（稅後）