[day 1] 馬耳他三藍之一 - Blue Grotto 藍洞 + 丁利懸崖日落
@ 藍洞 Blue Grotto

今次旅行我哋採用嘅方式係-搭巴士🚌 搭巴士環遊馬耳他係可行嘅，而且非常化算～機場可以買到七日巴士任坐卡，€21 ^{(HKD 170)}任搭。不過大前提係你要有時間，舉個例子，從我哋入住嘅斯利馬市區前往藍洞，如果自駕車程只係26分鐘，但係坐巴士因為要轉車同埋兜嚟兜去，足足需要75分鐘先可以到達😅 所以如果打算坐巴士玩馬耳他，一日入邊最多只能夠安排兩個景點👀想同我一樣坐巴士環島，咁就起碼要有五日或者以上嘅日子比較適合～ 藍洞位於本島，坐巴士可以响Panorama站落車，先去觀景平台，景色有少少似沖繩嘅萬座毛。之後沿着車路行落去大約10分鐘，就可以坐小船仔進入藍洞參觀，船仔8歐一人。船夫沿途會講解，會停幾個山窿，藍洞内嘅海水顏色好似漱口水咁藍～

之後再坐巴士去丁利懸崖Dingli cliff，呢度係睇日落嘅勝地，可惜當日黃昏時分烏雲密佈，乜嘢太陽都睇唔到呀，仲要勁大風勁凍😅無奈地唯有等巴士走人..返回住宿嘅旺區斯利馬。

第一日喺斯利馬海濱大道食咗兩間西餐廳， Portopalo及Cafe Sicilia Malta，千祈唔好去🤮都係食吓海鮮意粉同埋Pizza之類，誰不知真係好失望，明明評分有四點幾，都唔知佢點樣呃返來，難食到飛起啊！意粉又咸又硬，咸到啲鹽好似唔駛錢嗰隻，pizza係濕架😅之後再試左幾間餐廳都係有咁嘅情況，睇嚟佢哋係鍾意極重口味🤦🏾‍♀️

總結來講，第一日落機之後嘅行程就比較輕鬆簡單～輕輕鬆鬆睇風景就過咗半日👀

是日三人總消費

18/10 斯利馬 巴士7天任坐套票 EUR 63 ^{(HKD 511)} 午餐 Portopalo EUR 59 ^{(HKD 478)} 細水兩支 EUR 2 ^{(HKD 16)} Blue grotto EUR 24 ^{(HKD 195)} 晚餐 Cafe Sicilia Malta EUR 36.1 ^{(HKD 293)} Supermarket 大水兩支+蘋果及糖果 EUR 2.1 ^{(HKD 17)} The seafront tower 住宿兩晚 EUR 118 ^{(HKD 957)} Total EUR 304.2 ^{(HKD 2,467)}