亞美尼亞包車一日遊 - Geghard 格加爾德修道院 + Garni 加尼神廟 + 葉里溫階梯

格加爾德修道院 Geghard⛪️

Geghard 意思係「聖矛」，係隱藏喺峽谷入邊嘅世界文化遺產，歷史悠久，距離市區大約40公里，唔係好遠。傳說耶穌釘十字架之前，士兵用矛刺過耶穌身體。據說修建呢個修道院嘅目的就係為咗收藏「聖矛」，修道院建築從山岩中開鑿而成，石雕非常精美，內部結構好似石窟，入邊有多個石室，采光主要靠頂部天窗同埋側邊嘅石窗，好黑，行入去好似盜墓迷城咁，非常神秘！我去嘅時候咁啱有人喺度唱聖詩，山洞入邊好似環迴立體聲咁，通過天窗聲音穿過各石室，係天籟之音呀😝

仲有其中一個岩洞，裏面有一個地下泉水噴出，然後個個排隊飲「聖水」，我哋包車司機同我講，呢啲泉水係由山上雪山融雪而成🏔️我試咗一啖非常清甜😋 外面嘅石牆牆上有好多洞口，d人就會係咁丟石仔上去，據說如果成功卡中，就可以心願達成！ 雖然呢幾日已經睇過好多個修道院，但係個人覺得呢個係目前見過最有 feel 嘅，比深坑修道院更加特別！

加尼神廟 Garni Temple

加尼神廟 Garni 距離市區35公里，30至40分鐘車程就到，係亞美尼亞唯一一座古希臘羅馬柱廊式建築神廟。不過早年地震時已毁壞，1969-1975年復修重建，真正嘅遺跡就散落喺公園入邊。呢度算係少見嘅收費景點，門票 $1500 AMD ^{(HKD 29)}，建築其實唔係好大，冇睇相咁壯觀，不過都值得一去，因為同之前睇嘅修道院好唔同，而旁邊嘅觀景台可以睇到加尼峽谷～ 交通方法： 包車一日去呢兩個景點來回葉里溫 $6000 AMD ^{(HKD 117)} ($98 HKD) 包車司機聯絡方式： 司機 what’s app：Hagop（蝦膏）+374 43 187437 / +374 77 929938 仲可以坐巴士，不過非常轉折，建議包車，唔建議自駕，外高加索三國啲人揸車好癲，唔適合。

葉里溫階梯 Cascade Complex

位於葉里溫中心，廣場同埋每一層樓梯都內有乾坤，有各種現代藝術作品，登上樓梯嘅頂部仲可以望到阿拉臘雪山🏔️（挪亞方舟最後停泊處）。廣場旁邊仲有好多餐廳～行完樓梯可以落返去食飯！ 高加索遊記終於完結了～聽日會加多一篇實用資料💾之後就會移動到伊朗🇮🇷外高加索三國各有特色，而且消費都唔高，比歐洲大城市安全，非常值得一去～