四、係北韓居然要食葉?!

網上睇唔少人去過北韓都話無啖好多，所以我本身都對北韓菜無咩期望，不過始終黎到呢度，點都要試下，尤其朝鮮比較出名的冷麵。 第一樣要介紹當然係泡菜，始終係韓國傳統食物，而係車上，北韓導遊仲講笑話點解北韓人皮膚咁好，又咁健康就係因為日日食泡菜。不過佢又錯唔晒，美國健康雜誌《Health》曾經將泡菜評為世上五大健康食物之一。我本身好鐘意食泡菜，所以一坐低就試左泡菜先。賣相同平時或南韓見到的差唔多，食落去覺得味道不錯帶少少甜味，唔算好辣，蒜味比較突出。 之後要介紹一定係炸魚，呢道菜係每一間北韓的餐廳一定有呢道菜。由於小弟比較少食多骨魚，所以只係嘗試左一口，味道正正常常啦。反而我食得最多係薯仔炆豬肉，基本上同平時係香港食開的家庭小菜一般，估唔到都係北韓傳統菜式之一，薯仔夠粉，而豬肉無腥臊味，炆得夠諗入味，送飯一流! 最後要介紹一個特色菜式炸葉子，本身都有少少抗拒諗緊食唔食好，之後同團朋友食完後叫我一定要試下。講到咁人一世，物一世，點都要試下啦。食落去又真係幾好食。首先佢炸得唔錯，而葉比較薄，所以咬落去維持到脆口。加上粉脆有調味，食落去唔會口淡淡。 下篇會介紹傳說的朝鮮冷麵及北韓啤酒。