中東土豪炫富無極限？！阿塞拜疆🇦🇿另類體驗 - 納夫塔蘭石油浴
@ Sehirli Naftalan

呢個係我去阿塞拜疆最期待嘅一個活動！前日經過我前日親身嘅示範，可以話比大家知呢個係平民嘅治療體驗，$162港幣就可以入住療養院一晚，價錢仲已經包括左所有嘅 treatment、浸兩次石油、住宿及三餐膳食費用～ 不過由於我唔係自己一個人去，我需要徵求另外兩位同伴嘅同意..懷着一顆糾結的心去 present 佢地😛最後兩個都同意✌🏻感謝總是支持我各種奇奇怪怪嘅想法（例如舊年陪我去智利平原尋找某一種仙人掌原生地🌵、去納米比亞與豹同行🐆等等...)。反正就係佢哋同意之後我就開始做 research ~ 講小小背景先，位於亞塞拜疆中西部，距離首都巴庫320公里，有座近千年歷史古城納夫塔蘭市（Neftalan），呢度有好多油田，係盛産石油嘅地方亦係浸石油浴嘅聖地，大概有十幾二十間大型石油療養院，每年都有不少世界各地嘅人慕名而來（通常都係中東俄羅斯或附近前蘇聯國家）會入住一兩個星期，進行療養同埋安排各種療程～正所謂有病醫病冇病強身😂 再講下呢個石油浴嘅由來，據說多年前，一支絲綢之路上嘅駱駝商隊途經此地去中國，有隻駱駝受傷無法前行，主人只好忍痛遺棄，點知好神奇地佢主人一段日子之後返回，發現當時受傷嘅駱駝居然自己去石油湖浸好左 (Naftalan 嘅石油好近地面) ～奇蹟康復😵商人於是將石油敷响自己受傷嘅膊頭上面，果然有療效！於是d商人就將石油裝起，拎去各大城市兜售。 納夫塔蘭出產嘅石油富含環烷烴，不能燃燒，但正是它具有神奇的療效瀝青多，含硫磺量也高，具有消炎止痛、擴張血管、促進新陳代謝和加快傷口癒合等醫療作用的功效。環烷烴泡澡時通過皮膚進入人體，並隨血液迴圈作用於患處達到治療效果，能治療牛皮癬、風濕、關節炎、皮膚過敏、肌肉勞損等70多種疾病。當地仲有一個博物館，陳列著患者留下的拐杖和輪椅。 十幾二十間嘅療養院，有唔同嘅檔次，我入住呢一間叫「Sehirli」，算係比較 cheap 嘅，有少少似打機嗰啲瘋狂醫院或者大陸二三線城市 feel 😂不過整體都好舒適乾淨，其他有d療養院睇落去好高級好似五星級大酒店咁~~不過四星五星嗰d療養院一般都要住七日以上先可以浸石油浴，但我只係想住一晚體驗下咋！所以我能夠選擇嘅療養院唔多~我知有兩間~由於預訂實在有困難，我本想 walk in 入住，但又有小小擔心無房，到時山長水遠白行一趟，所以穩陣起見，最後我成功用俄文用 facebook 成功預訂✌🏻再安排左由首都 Baku 過去嘅車～ (一車 $100AZD)

阿塞拜疆啲人雖然唔識講英文，但係全部都好熱情友善，我哋一到達，前台員工加埋司機等等一大班人全部圍埋來想幫手，有啲就打電話俾識英文嘅朋友幫我地做翻譯，可能三個亞洲籍女子喺度實在少見😂呢幾日我覺得我自己好似動物園嘅動物咁不停被要求拍照圍觀🐒.. 我鍾意佢哋唔會因為你係外國人所以收費會有唔同或者開天殺價，經過一輪溝通之後俾錢登記護照就辦理好入住，收費每人$35AZD（$162hkd，按人頭算不是按房間），之後帶我地上房間，間房都幾唔錯，乾淨舒服有露台～ 之後好幾個人喺我哋房間到指手畫腳，話比我哋知幾點要去食飯，幾點要去見醫生，d設備响邊等等👨‍⚕️

我哋整頓完之後，就馬上去醫療室見醫生👨‍⚕️醫生都係指手劃腳問下你有邊度唔妥，我就話腰痛，同伴就係膊頭痛同埋另一個就頸痛，經過佢嘅 "診治"，我哋每人就得到一本「病歷簿及活動手冊」，醫生安排我哋要做四個唔同嘅療程（睇唔明係乜）😂

再指手劃腳一輪就叫我地去飯堂食晏，食飽飯再返去預約做療程時間~ 唔知係咪因為我哋三個亞洲籍女子特別明顯，去飯堂就即刻有人過嚟幫手(療養院啲人都覺得我哋係學生細細個，係咪擔心唔幫我我會食唔到飯😂），食物正常，飯古怪d，不過唔難食，一定保證你夠飽先~

食飽飯就去安排療程，個姑娘話one two three four 四個活動唔知乜😵又寫左一堆時間同字，反正叫我哋帶齊毛巾同洗頭水同埋病歷簿就follow me啦😛 療程One :肩頸背精油按摩💆 同返深圳揼骨一樣，有個頭洞嘅按摩床趴响度，等大媽幫你推油，d大媽好大隻，可能平時治療者個個都好大隻，所以力度十足，同伴們被當成肉餅咁㩒，差唔多㩒扁，con都飛走埋😂😂我個技師就男人嚟，力道就反而冇咁誇張，其實都幾舒服（但我超唔好意思），不過隔離有大媽望望下都好啲。好快玩完大概都係十幾分鐘✅ 療程two：熱蠟治療🔥 完成左推油按摩之後，就比姑娘即刻帶咗去第二個治療室，攞啲熱蠟倒落個患處，嘩嘩好熱呀😵我條腰呀😵我地三個係咁嗌熱😂唔通佢哋啲人唔怕熱嘅🤔之後等佢凝固，蓋被熱敷一陣，又係十幾分鐘之後，成pat剷走佢，完成✅ 療程three:紅外線石油熱敷治療💡 一樣係趴喺度，搽咗啲石油响背脊，有少少氣油味道，就後就要開始照紅外線燈，熱熱地咁樣，10幾分鐘完結✅ 療程four:石油浴🛁⭐️⭐️⭐️ 呢個活動最受歡迎，輪候時間都比較長。男女浴室分開，一個浴室大概入邊有五格浴缸。 入去更衣室除晒啲衫就可以行入一個充滿油漬嘅浴缸🛁工作人員大媽就係會幫你打開水龍頭🚰d石油就會好快咁湧出嚟淹沒成個人(除咗個頭，旁邊啲大媽會將石油搽落自己塊面度，不過我冇😛)。石油冇乜味道，叫做有淡淡嘅油香，溫度比較熱，大概40度，每人規定只可以浸10分鐘，浴缸旁邊有倒數計時器。第一次就唔可以過心口，第二日先可以浸到去頸～ 10分鐘之後工作人員就會倒走曬d石油，就可以企起身，佢拎一個鞋抽幫你刮走晒身上嘅石油，再俾一堆草紙你抹身，之後再比一個大海綿你喺旁邊浴室沖涼，沖涼嘅要訣就係一定要用洗頭水shampoo倒入海棉度捽，咁就好容易洗得甩。 之後工作人員吩咐我哋浸完石油大概會行氣活血，要保暖唔好吹風，要返房瞓覺（當下個人好熱流汗💦）我估係唔好又凍又熱攝親掛🤔 我當日嘅療程四步曲就係咁好快速咁完成，之後就返房休息，等到夠鐘食晚餐就落飯堂食飯，食完飯d院友就喺樓下公園搞音樂會，10點就會瞓覺，療養大概好似養豬咁嘅生活掛～（仲有拉筋運動堂我無去上）

之後第二朝瞓醒，又去飯堂食早餐，再去排多一次石油浴，第二次浸石油嘅水位更加高，有前一日經驗，第二次沖涼就比較有效率😛 總結嚟講，呢個石油浴體驗好過癮，醫療效用方面呢啲嘢就因人而異，我玩一日亦都冇特別追求。當係一個體驗來講，可以講係性價比超高！ 又長篇大論係因為呢個地方實在太冷門，網上實在冇資料，我當初做功課嘅時候都唔容易搵到，寫晒出嚟就等之後要去嘅人可以參考返😛