三、街上奇景

去北韩旅游主要都系坐旅游车，之后导游系车上有讲有笑，看似同普通旅行团无异，但其实有唔少规矩要遵守，其中一样就系旅游车行紧时唔可以拎相机出黎影相。当中有一位内地团友唔识死，唔至一次拎部相机偷偷地影相，令到本身笑笑口的导游突然间黑晒面，以凶神恶煞的态度同佢讲你如果再拎部相机出黎影相，否则后果自负，而我(导游)唔知会发生咩事。讲到咁严重，究竟有咩野唔俾影呢?虽然无图未必有真相，但都可以分享下街上几个奇景。 (一) 满城尽带计程车 坐旅游车的过程当中，其实我唔太理会导游的介绍，反而喜欢留意外面的环境。首先觉得奇怪的系路面除左我地架旅游车外，基本上无乜其他车行紧，最多行紧的反而系的士，彷佛感到「离晒地」的感觉。你想像唔到点解北韩会有咁大需求要咁多的士，一开始心谂系咪做假之际，我发现大部份的士都有人坐紧，同时亦有人会沿途截的士，彷佛需求好大。除左的士，另外就系单层巴士。每架巴士款式相对残旧，亦未有冷气提供，但都见到有好多人乘搭，我觉得咁先系反映番真实情况。 (二) 神秘的路人 街上除左见到的士外，仲有唔少路人。我发觉得佢地每人都有唔同的襟章，问过导游后，原来朝鲜人民满十七岁后就会得到襟章，证明系北韩人民的身份象征，有如我地的身份证一样，而襟章亦有几款，主要分开普通人民同党员。襟章主要印上已故领导人金日成同金正日的人像，而朝鲜人民必须将襟章戴系左边心脏位置，主要原因有两个﹕第一个系北韩系共产国家，亦即左派主义，而另一个原因系要人民无时无刻都要心系两位已故领导人。另外，无论起紧楼的建筑工人、搭紧巴士或的士的乘客、踩紧单车的人，甚至系街上倾紧计的路人，每当旅游巴经过，都会用一个奇怪的眼光望住我地，唔知系咪周围的路人对我地旅游巴真系有好大兴趣，定系有「其他」原因呢? (三) 空楼计 讲真，新义州的道路比一般东南亚国家如越南、柬埔寨等仲要平坦，周围亦好干净，无任何垃圾，不过就见唔到有任何垃圾筒。而道路两边都有唔少高楼大厦，大约八至十层高，似系70-80年代feel。不过有个奇怪的地方系当你仔细留意，会发现边间屋未必有门同窗，而家内里漆黑一片，睇落唔似有任灯同摆设，好似一座座空壳一样，我估这些「空楼」的存在某程度上系想令游客见到北韩繁荣的一面。