404 不存在的國家 - 納戈爾諾卡拉巴赫 Nagorno Karabakh (兩日一夜)，得來不易的獨立與和平 - Artsakh - Blog by 出發吧｜旅魔頭

高加索行程嘅第10日，我參加左一個兩日一夜嘅當地旅行團，前往實質獨立但不被國際承認，不存在嘅國家-納卡🌍今篇好長，但係太多野要交代，冇辦法短🤦🏾‍♀️關於納卡網上中文旅遊資料好少，所以我希望呢篇可以比嚟緊要去嘅人參考返～

國家背景

納戈爾諾-卡拉巴赫共和國係佢嘅全名（簡稱納卡或 Artsakh），意為山地中的要塞花園。蘇聯解體之後，納卡地區亦引發亞美尼亞同阿塞拜疆嘅領土爭端。經歷多次戰爭，1991年納卡公投宣布正式獨立，佢依家擁有自己嘅國旗、士兵（多為亞美尼亞人）同埋簽證等，但一直未被聯合國承認。國內人口>80%為亞美尼亞人，亦能使用亞美尼亞貨幣，唯一連接納卡嘅道路亦需由亞美尼亞前往🇦🇲但係偏偏被國際承認為阿塞拜疆嘅一部份，實在係非常諷刺，阿美尼亞及納卡雙方都好希望有朝一日可以統一，但係呢個夢想相信短期內都難以實現... 其實高加索地區受到爭議嘅404國家有幾個（另有阿布哈茲及南奧塞梯），不過其他都唔係好適合旅遊，納卡算係相對地安全穩定，同埋山區風景唔錯亦都多啲野睇～有深厚嘅歷史文化，去亞美尼亞嘅同時，值得用兩日或者三日時間前往遊覽。

有關高加索國家行程次序安排

亞美尼亞同埋阿塞拜疆雖然有好大面積範圍嘅土地接壤，但係係完全冇關口可以過境，因為佢哋係敵人，所以如果想玩齊高加索三國，行程編排通常為：阿塞拜疆-格魯吉亞-亞美尼亞🇦🇲，又或者調返轉，一定要將格魯吉亞擺喺中間。然後若有跡象顯示，曾經去過納卡地區，阿塞拜疆會禁止入境（入境表一定要寫冇去）⛔️所以若三國同遊，建議行程安排要去咗阿塞拜疆先，亞美尼亞對有阿塞拜疆出入境記錄嘅遊客管得唔嚴，但如果調返轉就會俾人問好多問題～(雖然納卡簽證係一張紙，可以來無蹤去無影，所以調返轉其實都冇話唔得嘅）

前往納卡方法

可以响亞美尼亞首都葉里溫參加兩日或者三日旅行團，又或者自行搭車前往，到達當地再包車。我選擇跟旅行團因為納卡景點分散，如果自己去可能好多景點去唔到，而且大部份景點都係嗰啲修道院，跟旅行團會有導遊英文介紹，知道啲歷史背景都好重要，然後重點就係跟團好平！兩日嘅旅行團只係收費$25000AMD ^{(USD 64)}($410hkd，包交通住宿導遊，非常抵玩，我差不多全部團友都係亞美尼亞人，除咗我哋三個，只有另外一位外國遊客）旅行社資料：one way tour（推薦👍🏼有好多亞美尼亞一日遊價錢都好抵，而且整體安排都幾好）三日納卡團$25000AMD ^{(USD 64)}：每逢星期二五有團兩日納卡團$33000AMD ^{(USD 85)}：每逢星期六有團（圖片入邊有行程嘅相）呢個圑時間非常之長，一大清早就集合，然後返到阿美尼亞葉里溫已經係夜晚12點，所以真係要兩個全日！網站： https://onewaytour.com/regular-daily-tours/nagorno-karabakh/

納卡旅行團第一日行程

第一日行程：didivank-sarsang reservoir-sea stone rocky lion-Vank village-Gandzasar monastery-Matenadaran of Gandzasar-we and our mountain-Stepanakert 上面行程睇落好似好多嘢咁，但係會落車停留介紹嘅景點主要係兩個修道院同埋石獅子。 Dadivank Monastery：距離納卡邊境唔遠，Dadivank 隱藏山林之中，九曲13彎之後先去到。鐘樓、壁畫等等都幾精美，由於戰爭時期曾經被一戶家庭用作住所（嗰陣佢哋唔信耶穌所以唔重視教堂），教堂牆壁都被煙薰黑，復原後則浮現出精美的壁畫，好有藝術價值。 Gandzasar Monastery：距離首都Stepanakert大約30分鐘車程。Gandzasar 含義係山頂的寶藏，係一個古老嘅修道院，建設於10-13世紀。 sea stone rocky lion：山邊用石造成嘅獅子🦁️好卡通搞笑！上面係比較重要嘅景點，當日黃昏大雨，所以最經典嘅爺爺奶奶山 we and our mountain 改為第二日先去)～

由亞美尼亞首都過嚟納卡邊界，到達納卡邊界大約需要四個鐘頭車程。邊界檢查站有兩條國旗，一個係亞美尼亞國旗🇦🇲另一支就係納卡

Dadivank Monastery，距離邊界唔係好遠嘅修道院。隱藏山林之中，九曲13彎之後先去到。鐘樓、壁畫等等都幾精美，由於戰爭時期曾經被一戶家庭用作住所（嗰陣佢哋唔信耶穌所以唔重視教堂），教堂牆壁都被煙薰黑，復原後則浮現出精美的壁畫，好有藝術價值。

Dadivank Monastery，建築兩邊嗰個凹位設計係用嚟抗地震，即係摺紙嘅道理，咁樣會企得穩啲

咁岩有一班學生喺度參觀緊，邀請我哋同佢影相😬可能真係比較少亞洲人，我哋嘅存在特別古怪😂

sea stone rocky lion：山邊用石造成嘅獅子🦁️好似喺度笑緊好有喜感😬

我哋又係人肉景點喇

到咗黃昏，旅行團將我哋送到首都 Stepanakert 嘅酒店。之後就自由活動，提供嘅酒店都唔錯，乾淨企理。由於餐食自理，所以我哋抵達酒店之後就即刻出去覓食，酒店介紹咗間唔錯嘅餐廳俾我哋，去咗就覺得都差不多啦冇乜特別，叫 Ureni Restaurant。之後我哋就喺市區度周圍行吓，當日咁啱有一場足球賽，城內市民都去咗睇，我哋又去睇下，誰不知我哋睇波，啲群眾就睇我哋🤦🏾‍♀️🤦🏾‍♀️🤦🏾‍♀️可能太少亞洲人，我哋真係好異樣，所以個個都係咁打量我哋😅情況同阿塞拜疆有少少相似... 之後夜晚我哋響街周圍行，去咗大廣場等市區景點，周圍都好多人，因為係週末（夜晚感覺都安全），不少人拉住我哋合照，或者上前搭訕話要做朋友....😅😅😅😅好似動物園啲動物咁😆唔討厭嘅，感覺啲人都幾友善嘅～不過都冇乜特別野睇就早啲返去瞓覺了～

入到球場已經十二碼，我哋睇波，啲人睇我哋..所以我哋行得好出，費事行入人群入邊俾人望住

非法入境驚魂

又有故事要講🤦🏾‍♀️早上7:00旅行團集合，一早要坐幾個鐘頭車～旅行團嘅車係benz van仔，一團20人左右。我地大約坐左三個鐘，導遊提醒我哋一陣會去到邊境檢查站，大家要準備檢查證件，外國遊客要落車做簽證，旅行團免簽證費，然後我同行小伙伴忽然間發現自己唔記得帶護照😱因為旅行團只去兩日，我哋將個篋寄存左係葉里溫hostel度，孭住一個小背囊走左，然後小伙伴就唔小心將護照擺咗喺個篋入邊，然後帶喺身上嘅係舊護照😬 死火🔥即刻通知導遊，心諗應該可能要折返冇得去了..誰不知導遊同公司溝通之後，叫我小伙伴到咗關口唔好落車，淨係我同另外一個落車，佢坐喺車入邊扮瞓覺（車係茶色玻璃睇唔到入邊嘅，然後檢查站士兵都唔會查車），然後佢就竟然成功瞞混過去😅 所以佢係一個非法入境者，街上一見到警察就淆底😂不過最後有驚無險咁留咗喺納卡兩日😬

我同伴唔記得帶passport 🤦🏾‍♀️然後喺車上邊唔落車，呢張相係佢響車上偷影我哋落去做簽證😂佢話佢驚到賴屎，因為下邊有啲士兵佢好驚查車

第一日消費

（由於團費前一日交左，所以使得好少錢） D10 8/6 納卡tour 午餐$2750AMD ^{(USD 7)} 晚餐$6700AMD ^{(USD 17)} 水果$140AMD ^{(USD 0)} 水1.5L$300AMD ^{(USD 1)} 廁所$600AMD ^{(USD 2)} Total:$10490AMD ^{(USD 27)}/3=$3497AMD ^{(USD 9)}=人均消費$57HKD ^{(USD 7)}

納卡旅行團第二日行程

去到高加索嘅第11日，繼續探索納卡呢個特殊、獨立卻又不被世界認可嘅國家。呢一日行程好豐富，睇嘅除咗自然景色，教堂，仲有啲戰爭遺跡等等....睇完之後返回亞美尼亞首都，已經夜晚12點😱 納卡第二日行程: 行山前往 zontikner (umbrella) 雨遮瀑布 - Shushi fortress 及 victory tank 抗戰勝利坦克車 - jdrduz 峽谷 - kanach jam church - ghazanchetsots church - Stepanakert 中央市場 - we and our mountain 爺爺奶奶山🏔️

Zontikner (umbrella) 雨遮瀑布

晨咁早就酒店集合，第一站竟然係去行山，死火，我同我朋友仔都係著拖鞋，導遊都望住我哋隻腳疑惑左一下😂仲要只有一對鞋😅不過後來覺得自己無比英明，因為行到umbrella 嘅時候要濕腳，其他健步如飛嘅團友大家都狼狽又要除鞋，我哋兩個就可以就咁爬上去，順便洗腳😂不過強烈建議都係着返對鞋（除非係着緊拖鞋嘅高手），尾段有啲部份地滑，同埋真係要手腳兼用先可以爬到上去。我哋沿 Hunot canyon，行入去 zontikner (umbrella) 雨遮瀑布，umbrella 係溪流水流入，鋪滿苔蘚嘅雨傘型洞穴，已經形成咗幾個世紀，只能夠步行前往。係納卡Shushi 一個好標誌性嘅自然景點，非常有趣！來回大約需要行個半鐘，幾公里左右，我哋一團大約20人，有啲係大年紀嘅阿姐，唔好以為人哋年紀大個個行起山都健步如飛，反而我哋三個成日包尾😅起初大部份山路都唔係話好難，但係尾段都要手腳並用而且會濕水～如果要行入洞邊一定會全身濕晒～

zontikner (umbrella) 雨遮瀑布，umbrella 係溪流水流入，鋪滿苔蘚嘅雨傘型洞穴，已經形成咗幾個世紀，只能夠步行前往。係納卡 Shushi 一個好標誌性嘅自然景點

Shushi Fortress 及 Victory Tank 抗戰勝利坦克車

Shushi呢座城市響92年納卡衝突中係重災區之一，時至今日路邊仍有不少廢棄的樓房與戰爭遺跡。當中有一架T72坦克同埋紀念碑擺放咗喺山邊，用以紀念Shushi當年亞美尼亞軍隊抵抗阿塞拜疆軍隊，利用山區嘅優勢及戰術，用坦克車引開敵軍，其中三位士兵有兩位英勇犧牲（其中一位而家還活着），呢場戰役得以勝利。雖然坦克車好似平平無奇，對佢哋人民好有意義，表示左戰爭後得來不易嘅自由。

victory tank抗戰勝利坦克車紀念碑💣 92年嘅戰爭，其中三位士兵有兩位英勇犧牲（其中一位而家還活着），呢場戰役得以勝利。雖然坦克車好似平平無奇，對佢哋人民好有意義，表示左戰爭後得來不易嘅自由。

Jdrduz 峽谷

再之後我哋又有少少行山，去到jdrduz峽谷。Jdrduz懸崖峽谷位於Hounot峽谷自然保護區。有400幾米嘅懸崖峭壁，風景如畫～一行入去就有一大片雛菊花海，好靚🌼遠處見到啲當地人喺度野餐～

Kanach Jam Church 及 Ghazanchetsots Church 兩個教堂

Ghazanchetsots 大教堂建於19世紀末，不過之後毀於戰亂。如今的教堂係20年前修復，所以好新。教堂成座白色，好現代化。不過好諷刺在於而家呢座教堂出現響阿塞拜疆呢伊斯蘭國家名義領土上，相當諷刺😣然後我哋喺入邊見到幾個士兵喺度參觀，幾高大威猛咁嘅款😂我哋喺度眼望望佢，佢又喺度眼望望我哋😬最後，佢邀請我哋同佢哋合照，嘻嘻，啱喇其實我哋都想影不過唔好意思出聲先😂 另外 Ghazanchetsots 大教堂108前曾經有件美事，就係有675對情侶同時一齊喺呢個教堂結婚，由一位富商贊助呢個婚禮，佢同時亦提供資金比佢哋建立家庭，即係例如生咗小朋友又再俾錢佢哋讀書，同埋協助好多當地基建，算係當地嘅一位偉人（不過後來比俄羅斯囚禁兩年前死咗），上網可以搵到當年大型婚禮嘅照片，非常壯觀！令一個教堂 kanach jam church 又名 "green church"，同上面嗰個一樣都係喺shushi入面，同上面嗰個好近，但係呢個比較細，一樣都係新式嘅教堂。由於已經睇得好多教堂，所以細嘅都冇乜認真睇了～

Ghazanchetsots 大教堂⛪️ 我哋喺入邊見到士兵喺度參觀，幾高大威猛咁嘅款😂我哋喺度眼望望佢，佢又喺度眼望望我哋😬最後，佢邀請我哋同佢哋合照，嘻嘻，啱喇其實我哋都想影不過唔好意思出聲先😂

Stepanakert Central Market 中央市場

其實係類似一個街市咁，有蔬菜水果乾果等攤檔。午餐我哋喺度解決，食咗一個「茜餅」正名為zhingyalov Hats，係當地特色小食，芫荽及其他香菜餡餅🥙鍾意食芫荽嘅人嘅福音，我同伴嘅地獄😂$500AMD ^{(USD 1)}($8hkd一大個)，味道唔錯好香，我幾鍾意食😂 另外仲有一隻當地水果，mulberry 白莓，雖然其貌不揚，生到成條虫咁嘅樣，但係真係好好食呀！好甜~~~不過要盡快食晒佢，因為好容易爛！

一隻當地水果，mulberry 白莓，雖然其貌不揚，生到成條虫咁嘅樣，但係真係好好食呀！好甜~~~不過要盡快食晒佢，因為好容易爛！

食咗一個「茜餅」正名為zhingyalov Hats，係當地特色小食，芫荽及其他香菜餡餅🥙鍾意食芫荽嘅人嘅福音，我同伴嘅地獄😂$500AMD ($8hkd一大個)，味道唔錯好香，我幾鍾意食😂

We and our mountain 爺爺嫲嫲山

冇去過爺爺嫲嫲山We and our mountain就等於冇去過納卡！！呢個係最地標性嘅景點，沒有之一！响Stepanakert 首都周邊一座小山上邊，一對年老夫婦嘅半身雕像，用火山岩雕刻而成🗿雕像係只有半身冇腳嘅，以此表達植根在自己土地上嘅人民精神！好有象徵式嘅意義~係國家象徵！由於我哋旅行團架車壞咗要去維修，所以我哋三個自己搭的士先過嚟玩～我好彩，當日撞到一對銀樂隊專登過嚟影相！俾我哋捕捉到佢😛 然後爺爺嫲嫲山下邊有好多小販檔，我覺得呢度係最適合買記念品，因為最多，有磁石、木雕等等小商品～

之後去到納卡地標 - 爺爺嫲嫲山 we and our mountain ，遇到一隊銀樂隊

we and our mountain ，表達植根在自己土地上嘅人民精神！平時啲Pose有啲悶，所以我用一個唔同嘅角度出現😂

冇去過爺爺嫲嫲山We and our mountain就等於冇去過納卡！！呢個係最地標性嘅景點，沒有之一！

第二日消費

D11 9/6 納卡tour 可樂一支$340AMD ^{(USD 1)} 紀念幣三個$3000AMD ^{(USD 8)} 磁石三個$3500AMD ^{(USD 9)} 廁所$300AMD ^{(USD 1)} 可樂一支$300AMD ^{(USD 1)} 香草餅$500AMD ^{(USD 1)} 士多啤梨一盒$700AMD ^{(USD 2)} Mulberry 一盒$500AMD ^{(USD 1)} 之後三晚住宿$34830AMD ^{(USD 89)} Kyle磁石兩個$2000AMD ^{(USD 5)} 天使吊飾一個$2000AMD ^{(USD 5)} 我磁石一個$1000AMD ^{(USD 3)} 熱狗+薯條$1500AMD ^{(USD 4)} 雞卷兩個$1700AMD ^{(USD 4)} 的士去爺爺奶奶山$800AMD ^{(USD 2)} Total:$52970AMD ^{(USD 136)}/3=$17657AMD ^{(USD 45)}=人均消費$289hkd（比較多係因為一次過交左三日嘅住宿費）

總結

我覺得而家嘅納卡值得一去，主要係因為佢特別嘅歷史，而且未來可能有一日納卡會同亞美尼亞合併，而家應該要抓緊機會去睇下呢個仲係「國家」嘅納卡，同埋佢地來之不易嘅獨立及和平。寫在最後，納卡呢個國家雖然得唔到世界嘅認同，但獨特嘅歷史文化，去亞美尼亞嘅同時值得抽兩三日一去。祝願納卡有一日可以得到真正和平，人民能夠得償所願回歸亞美尼亞嘅懷抱🤲

* * * article collected under 出發吧｜旅魔頭 / Artsakh * * *

404 不存在的國家 - 納戈爾諾卡拉巴赫 Nagorno Karabakh (兩日一夜)，得來不易的獨立與和平

Contents