現職空姐，工餘時間不停去旅行，捐窿捐罅四圍走
2019年9月6日
高加索行山勝地
@ Juta ჯუთა
Kazbegi, Georgia
山岳、洞穴
一二三四五六日全日
去 Juta Valley 行山係我格魯吉亞行程入面最喜歡嘅一個活動❤️
繼續仲係 day 7 嘅行程，一早由 Stepantsminda 去完卡兹別克嘅聖三一教堂之後，我地就去 Juta 行山👣
Juta 係一個行山好去處，風景優美。距離 Stepantsminda 大約20公里，車程大約35分鐘，全部都係山路，由巴士站包的士來回 $120GEL (HKD 332)（包含等候四到五小時）。由於位置比較偏遠，冇公共交通工具可以直達，只能自己包車，又或者可以預訂巴士站附近旅行社嘅小巴士（$30GEL (HKD 83)一人，早上有兩班）。
Juta 山腳下有幾間小酒店可以入住，重點係山上亦有兩間 campsites 可露營或者入住木屋，設施齊備，廁所啊餐廳通通都有！超正啊，一行出門口就見到個大雪山🏔️
首先，行近啲嗰間叫做 Zeta Camping，由山腳起大約30分鐘內就可以行到上去，再入d嘅叫 Fifth Season，景觀更開揚廣闊，不過就要行45分鐘左右先到，如果有行李要入住就比較麻煩（可以請驢仔拖上去）。
本來我想入住一晚，但係又好擔心山區會落雨，行上去就好濕滯，而且天氣會好凍，諗住觀察下個天氣先，臨近入住先 book，誰不知我決定要 book 嘅時候已經冇晒房，哎呀，冇得住喺山上面添🤦🏾♀️冇辦法，咁我唯有由 Stepantsminda 出發當天來回吧，都好嘅唔使搬酒店咁麻煩..
Juta 高加索山區係行山勝地，可以因應能力而選擇長短不一樣嘅行山路線（有啲專業嘅行山旅行團可能行一至兩日都有），由於我哋時間有限，所以就選擇行到 Zeta Camping 先食飯休息一陣，再行上 Fifth Season 就行返轉頭，建議逗留起碼六個鐘，咁就唔使趕頭趕命，可以喺山上面hea下～
山路都唔算難行，起初比較斜同凹凸不平多石仔，但整體來講都算簡單易行，我有見到亞洲籍嘅家長帶同小朋友一齊行上去。
Campsite 食物一般而且比較貴，不過隨便食下就是但啦😅仲有記得帶水同埋外套上山～
豆袋沙發同吊床都係 Fifth Season 嘅設施，唔係住客都可以用，只需幫襯食野或買野飲就可以了～
強烈推薦會去卡兹別克 Stepantsminda 嘅朋友，可以停留大半日時間去 Juta 行山，有條件嘅可以住一晚添～絕不後悔呀！
| 上一篇 | : | |
| 下一篇 | : |