終、珍惜自由的空氣

呢篇只是想講番整個北韓遊歷的感受。講真，如果以跟團黎講，其實安排得不錯，北韓導遊亦很專業，不過整段時間我警覺性甚高，不敢隨便講野，有時甚至覺得有點鬱悶、窒息的感覺，或者是自己問題吧。 由於新義州接近中國境內，有機會收到內地網絡，因而禁止攜帶手機入境。患左「手機依賴症」的我已經感到「囉囉攣」。之後當天去到丹東集合，領隊係出發前同我地作briefing，從未試過跟旅行團要有幾十項注意事項，而每段注意事項之前亦未經歷過，例如只可以影北韓美好的事、唔可以講其他國家/地方的好。雖然佢無禁止你言論自由，但其實暗地裏已經叫你小心說話。 還有行程中有不少隨行人員跟隨，仲有人同你全程拍片，還有凝望住你的路人，以及導遊警告那名想影街景的內地遊客再唔停止拍攝就「後果自負」，種種情況都濔漫著白色恐怖，令你自動會謹言慎行。人最慘的情況莫過於此，並不是被人剝奪自由，而是自己被迫將自由放棄。 最重要的是今次來回北韓其實並沒有出境紀錄，而護照全程亦被扣留，加上無手機無得上網。衰D講句，你係北韓俾人溶左都未必有人知。或者我個人膽小，我真係唔敢講「多」任何野、做「多」任何事。 難怪同團朋友當返回丹東後，不禁說了句﹕「終於可以呼吸到『自由』的空氣。」我即場苦笑。 兄弟們，請各自努力珍惜及守護自由的空氣，共勉之!